اللہ کے رسول سراپا معجزہ بن کر آئے ۔ خالد سیف اللہ ازہری (نیپال اردو ٹائمز)

 

از قلم : خالد سیف اللہ ازہری گورکھا نیپال

اللہ کے رسول سراپا معجزہ بن کر آئے۔

حضرت خاتم النبیینﷺ ہر لحاظ سے کامل و اکمل تھے جس طرح آپ کا اخلاق باکمال تھا اسی طرح آپ کی تخلیق بھی ہر طرح مکمل تھی، آپﷺ نے عملی طور پر تو دنیا میں انوکھی تحریک اصلاح اٹھائی کہ جس کی کوئی مثال موجود نہ تھی، کوئی لیڈر، ریفارمر، کوئی مصلح آج تک اتنا کامیاب نہیں ہوسکا جس تحریک اسلام کے ایک ایک پہلو سے دنیا میں عدل و انصاف قانون کی حکمرانی کے ساتھ ساتھ اللہ کی محبت ، واطاعت فرمانبرداری کو عنوان مل گیا ۔ اسی طرح آپ اپنے وجود مقدس میں بھی بے مثال تھے ۔ آپ کے رخ انور اور قد و کاٹھ کے بارے میں صحابہ کرام ؓسے لے کر آج تک اپنوں اور غیروں نے وہ مدح سرائی کی ہے جس کاکوئی اندازہ نہیں ہے ۔خاص طورپرام معبد خزاعیہ نے جو الفاظ حضورﷺکا سراپا بیان کرتے ہوئے بولے محدثین علماء ادب و لغت ان کا ترجمہ کرتے کرتے تھک گئے لیکن الفاظ کاسحر اور تعبیرکی جادوگری ختم ہونے کا نام ہی نہیں لیتی ۔صحابہ کرامؓ میں سے حضرت براء بن عازبؓ ، حضرت ابوہریرہؓ، حضرت علی المرتضیٰؓ،حضرت سلمان الفارسیؓ ، حضرت قرہ بن ایاس المزنیؓ ، حضرت جابربن سمرہؓ ، حضرت ابورمشہؓ ، حضرت بریدہ اسلمیؓ، حضرت عبداللہ بن سرجنؓ ، حضرت عمرو اخطبؓ، حضرت ابو سعید خدریؓ، حضرت سائب بن یزیدؓ ،حضرت حسان بن ثابتؓ اور ام المومنین سید ہ عائشہ صدیقہ بنت صدیقؓ نے سراپا اقدس کو بیان کیا ہے ۔ محدثین نے آنحضرت اقدسﷺ کے حسن کو بیان کرنے کیلئے حدیث کی مستقل کتابیں لکھیں جنہیں شمائل کہا جاتا ہے ۔ حضرت امام ترمذی نے شمائل ، قاضی عیاض نے الشفا بتعریف حقوق المصطفی ، امام ابن قیم الجوزیہ کی زاد المعاد بہت نمایاں اور مشہور ہیں ۔غیر مسلموں میں ہری چند اختر ، لال کنہیاجیسے شاعروں نے بھی والہانہ انداز میں خاتم النبیینﷺ کو خراج تحسین پیش کیا۔ شیخ سعدی نے لایمکن الثناء کما کان حقہ ۔بعدازخدا توئی قصہ مختصر ، ہندوستان کے مردقلندر غالب نے تو ایک ہی شعر میں کمال کردیا’’غالب ثنائے خواجہ را بہ یزداں گزاشتیم…کہ آں ذات پاک مرتبہ دان محمد است ۔اعلٰحضرت امام احمد رضاؒ نے تو عقیدت کے ساتھ منقبت و مدحت مصطفوی کے دریابہا دئیے ۔ حضرت پیر مہر علی شاہؒ کی معروف نعت’’اج سک متراں دی ودہیری ایہہ ، کیوں جندڑی ادا س گھنیری اے‘‘ وجد طاری کردیتی ہے۔ توحید و سنت کے معروف شاعر مولانا حکیم علی محمد صمصمام کا تو جواب ہی نہیں ان کی توپوری شاعری مدحت سید الانبیاءﷺ سے عبارت ہے ،کوئی کہاں تک گنتا جائے ناممکن ہے۔  صحابہ کرام میں سے حضرت براء بن عازب ؓسے مروی ہے کہ میں نے سرخ لباس میں لمبی زلفوں والے کسی شخص کو نبیﷺ سے زیادہ حسین نہیں دیکھا۔ آپ کی زلفیں کندھوں تک ہیں اور آپ کے دونوں شانوں کے درمیان کافی فاصلہ تھا ۔ آپ کا قد نہ چھوٹا تھا نہ بہت لمبا(ترمذی)چاند جیسا چہرہ ایک آدمی نے حضرت براء بن عازب سے پوچھا کہ کیا نبیﷺ کا رخ انور تلوار کی طرح (چمکدار) تھا فرمایا نہیں چاند کی طرح تھا روشن تھا(ترمذی ۔مولانا حکیم محمد علی صمصام نے اس حدیث کا والہانہ ترجمہ کیا ’’میں چاند کہوں انصاف نہیں ،چاند کا تو چہرہ ہی صاف نہیں)حضرت ابوہریرہؓ کابیان ہے کہ میں نے آپﷺ سے زیادہ کوئی حسین نہیں دیکھا ۔ رخ مبارک میں لگتاتھا جیسے سورج رواں ہو ۔ چلنے میں آپ بہت تیزچلتے تھے گویا زمین آپ کیلئے لپیٹ دی جاتی تھی گویاآپ بلا تکلف چلتے تھے ۔حضرت جابرؓکہتے ہیں کہ رسول اللہﷺ حسن وجمال میں حضرت ابراہیم علیہ السلام کے مشابہہ تھے ۔بے مثال حسین، حضرت علی ؓ سے روایت ہے کہ نبیﷺ نہ تو بہت لمبے قد والے تھے اور نہ ہی بہت چھوٹے قد والے تھے ۔ آپ کی ہتھیلیاں اور قدم پر گوشت تھے ۔ سر مبارک بڑا ، ہڈیوں کے جوڑ بڑے تھے ، سینے اور ناف کے درمیان بالوں کی لمبی سی لکیر تھی ۔ آپ چلتے تو آگے کی طرف جھکاؤ ہوتا گویا کہ بلندی سے اتر رہے ہوں میں نے آپ سے پہلے اور بعد آپ جیسا کوئی نہیں دیکھا۔(ترمذی)حضرت علیؓ سے دوسری سند کے ساتھ ترمذی نے ذکر کیا ہے کہ آپﷺ کے موئے مبارک نہ تو بہت گھنگھریالے تھے نہ بالکل سیدھے بلکہ تھوڑے تھوڑے گھنگھریالے تھے ۔ چہرہ مبارک نہ تو بالکل پر گوشت تھا اور نہ ہی مکمل طور پر گول تھا بلکہ کچھ گولائی تھی ۔ رنگ سرخی مائل سفید تھا، آنکھیں سیاہ ، پلکیں دراز ، جوڑوں کی ہڈیاں موٹی تھیں ۔ مونڈھوں کے سرے اور ان کے درمیان کی جگہ پرگوشت تھی ۔ جسم اطہر پر معمول سے زیادہ بال نہ تھے ، سینہ مبارک سے ناف تک بالوں کی لکیر تھی ۔ ہتھیلیاں اور دونوں پاؤں پر گوشت تھے ۔ چلتے وقت پاؤں جما کر چلتے گویا بلندی سے اتر رہے ہوں ۔ کسی کی طرف متوجہ ہوتے تو نظر بھر کر پوری توجہ ملتفت فرماتے ۔ دونوں کندھوں کے درمیان مہر نبوت تھی ۔ آپ خاتم النبیینﷺ تھے ۔ سب سے زیادہ سخی دل اور سب سے زیادہ سچ بولنے والے تھے ۔ سب سے زیادہ نرم طبیعت اور سب سے زیادہ شریف گھرانے سے تعلق رکھتے تھے ۔ آپ کو اچانک دیکھنے والا مرعوب ہوجاتا اور آپ کے ساتھ رہنے والا مانوس ہوکر فدا ہوجایا کرتاتھا۔ آپ کا وصف بیان کرنے والا کہتا ہے میں نے آپ سے پہلے اور آپ جیسا کوئی نہیں دیکھا۔مہرنبوت حضرت سائب ؓبن یزید کابیان ہے کہ میں نے آپ کے دونوں کاندھوں کے درمیان مہرنبوت کو دیکھا تو وہ چھپرکھٹ کے درمیان گھنڈی کی طرح تھی۔ حضرت جابرؓ بن سمرہ کہتے ہیں کہ کبوتری کے انڈے کی طرح سرخ ابھرا ہواگوشت تھا۔اس موضوع پر حضرت سلمان ، قرہ بن ایاس مزنی ، جابربن سمرہ ، ابورمشہ ، بریدہ اسلمی، عبداللہ بن سرجن ، عمرو اخطب اور ابو سعید سے بھی روایات ہیں(ترمذی)کشادہ روئی۔ حضرت جابربن سمرہ رضی اللہ عنہ کابیان ہے کہ رسول اللہﷺ کا دہن مبارک کشادہ ، آنکھوں کے کنارے لمبے اور ایڑیاں باریک تھیں۔تکلم نبوت ام المومنین حضرت عائشہ ؓ فرماتی ہیں رسول اللہﷺ تم لوگوں کی طرح جلدی جلدی گفتگو نہیں فرمایا کرتے تھے بلکہ آپ کی گفتگو نہایت نکھری ، واضح ہوتی تھی سننے والا یاد کرلیتاتھا۔حضرت انسؓ کابیان ہے کہ رسول کریمﷺ عموماً ایک بات تین بار دہراتے تاکہ اچھی طرح سمجھ آجائے ۔حضرت ام المؤمنین عائشہؓ کابیان ہے کہ میں نے رسول اللہﷺ کی صاحبزادی شہزادی جنت سیدہ فاطمہ ؓ سے بڑھ کر کسی کو عادات ، حسن، سیرت اور وقار نیز اٹھنے بیٹھنے میں نبیﷺ سے زیادہ مشابہہ نہیں دیکھا۔ جب فاطمہؓ آتیں تو نبیﷺ کھڑے ہوجاتے انہیں چومتے اور اپنی جگہ بٹھاتے اور جب حضورﷺ ان کے ہاں تشریف لے جاتے تو وہ کھڑی ہوجاتیں ، حضورﷺ کو چومتیں اور اپنی جگہ پر بٹھاتیں۔ نبیﷺ علیل ہوئے تو فاطمہؓ آئیں اور آپﷺ پر جھک گئیں آپﷺ کا بوسہ لیا پھر سر اٹھایا اور رو پڑیں ۔ دوبارہ جھکیں اور سر اٹھایا تو ہنس رہی تھیں ۔ حضورﷺ کی وفات کے بعد میں نے ان سے پوچھا کہ بتاؤ کہ آپؓ جب حضورﷺ پر جھکی تھیں اور رو پڑی تھیں دوسری دفعہ ہنس پڑی تھیں اس کی کیا وجہ تھی ۔ فاطمہ ؓنے جواب دیا اب راز فاش کیے دیتی ہوں ۔ حضورﷺ نے مجھے بتایا تھا کہ اس مرض سے میں جانبر نہ ہوسکوں گاتو میں رو پڑی تھی ۔ پھر بتایا کہ اہل بیتؓ میں سے سب سے پہلے تم مجھے ملو گی یہ سن کر میں خوش ہوگئی ۔ابواب المناقب میں امام ترمذی نے یہ روایت حضرت ام سلمہؓ سے ذکر کی کہ فتح مکہ کے بعد نبیﷺ نے شہزادی فاطمہؓ کو بلایا اور ان کے کان میں کچھ کہا اور ہنسنے کاسبب یہ بتایا کہ نبیﷺ نے فاطمہؓ سے کہا کہ وہ مریم بنت عمران کے سواتمام جنتی عورتوں کی سردارہوں گی۔(ترمذی)جب خیمہ ام معبد میں چاند نبوت چمکا ۔سفر ہجرت میں نبی اقدسﷺ کا گزر ایک خاتون کے خیمہ سے گزرا جو خزاعی قبیلے سے تعلق رکھتی تھیں ۔ مسافروں کو کھلاتی پلاتی تھیں ۔مسافر ان سے کھانے کاسامان بھی خریدتے تھے ۔ ام معبدسے نبی ﷺ سے کھجوریں خریدنے کاارادہ فرمایا لیکن ان کے پاس کوئی چیز نہ تھی۔خیمے میں ایک جانب بکری بندھی ہوئی تھی جو کمزوری کی وجہ سے ریوڑ کے ساتھ نہیں گئی تھی ۔آپﷺ نے اس سے دودھ نکالنے کی اجازت مانگی۔گھر کے سارے برتن بھر گئے ۔ شام کو ان کا خاوند گھرآیا توانہوں نے اپنے خاوندکوبتایا کہ آج ایک ایسا مہمان آیاجس کاسراپا کچھ یوں تھا ۔’’وہ ظاہری وضع و قطع کے حامل تھے ۔جسمانی بناوٹ بڑی معتدل تھی ۔ چمکتا رنگ ۔تابناک چہرہ ، خوب صورت ساخت ۔ نہ پیٹ باہر کو نکلا ہوا تھا نہ سر کے بالوں میں گنج ۔ جمال جہاں تاب کے ساتھ ڈھلا ہوا پیکر ، سرمگیں آنکھیں ، لمبی پلکیں، بھاری بارعب آواز ، صراحی دار گردن ، سیاہ اور سفید آنکھیں ، باریک اور باہم ملے ہوئے ابرو، چمکدار سیاہ بال ، خاموش ہوں تو وقار جھلکتاتھا بولتے تو موتی رولتے ،گفتگو میں شیرینی، دور سے دیکھو تو جمال جہاں آراء ، قریب سے دیکھو تو سب سے حسین سراپا ، بات کرتے تو دوٹوک اور بالکل واضح ، نہ بہت مختصر نہ بہت لمبی ، انداز ایسا کہ لڑی سے موتی جھڑ رہے ہوں ۔ درمیانہ قد ، نہ چھوٹا جو نگاہ میں نہ جچے ۔نہ لمبا کہ ناگوار لگے ، دو شاخوں کے درمیان کی ایسی شاخ کی طرح جو سب سے خوشگوار محسوس ہو۔آپ کے ساتھی ہمیشہ آپ کے گرد جیسے چاند کے گرد تارے ۔ بولیں تو کائنات تھم جائے ، حکم دیں تو سب بجا لانے کو تیار۔مطاع و مکرم ۔ نہ ترش رو نہ لغو گو البدایہ والنہایہ 6/29زاد المعاد2/54)حضرت عائشہ ؓ اور رخ انور۔ایک دفعہ آنحضور ﷺ اپنا جوتا مرمت کررہے ہیں اور پسینے کاایک شوخ قطرہ رخ انور سے بہہتاہوا ناک مبارک کی نوک پر آ ٹھہر گیا ۔سورج کی کرنیں بھی رخ مبارک کو چوم رہی تھیں ۔ جن سے یہ قطرہ ایک موتی کی طرح چمک رہاتھا ۔حضرت عائشہ نے یہ لذت بھرانظارہ دیکھ کر عرض کیا ۔ حضورﷺ اگر اس حالت کو مشہور شاعر ابوکبیر ہذیلی دیکھ لیتا تو یہ شعر آپ ہی کیلئے خاص کردیتا۔ پوچھا کیساشعر اور کیسی کیفیت ۔ عائشہؓ نے عرض کی اور شعر پڑھا۔٭’’پس جب میں نے محبوب کے چہرے کی رگوں اور گزرگاہوں کودیکھا تو ایسے لگا جیسے پانی ٹپکتے ہوئے بادل ہیں۔‘‘آنحضورﷺ حضرت عائشہؓ کی ان محبت پاش نگاہوں سے بڑے محظوظ ہوئے اور اپنی مصروفیت چھوڑ کر عائشہ کی پیشانی پر بوسہ دیا اور فرمایاعائشہ اللہ تجھے اسی طرح خوش کرے جس طرح تو نے مجھے سرشار کیاہے ۔ اندھیری شب میں ان کی پیشانی یوں نظر آتی ہے تو اس طرح چمکتی ہے جیسے روشن چراغ٭زلیخا کی ملامت گر عورتیں اگر ان کی پیشانی دیکھ لیتیں ۔ تو اپنے ہاتھ پر نہیں دلوں پر چھریاں چلا لیتیں۔٭ احمد مجتبیٰﷺ کے بعد ان جیسا کون تھا یا ان جیسا کون ہوسکتاہے …حق کے نظام کو قائم کرنے والا ملحدوں کو سراپا عبرت بنادینے والا ۔روضہ رسالت مآب صلی اللہ علیہ وسلم کے مواجہہ شریفہ کی جالیوں پر کندہ نعتیہ اشعارکا ترجمہ٭ اے بہتر ان سب سے جن کے اجساد شریفہ خاک میں مدفون ہوئے ہیں٭ اور ان کی خوشبو سے جنگل اور پہاڑ مہک گئے٭ میری جان اس پاک قبر پر فدا جس میں آپ سکونت فرما ہیں۔٭اس قبر شریف میں پاکبازی ہے اور اس میں جود اور کرم ہے۔یا صاحب الجمال و یا سید البشر،من وجہک المنیر لقد نور القمر،لا یمکن الثناء کما کان حقہ بعد از خدا بزرگ توئی قصہ مختصر۔

 

*خالد سيف الله أزهري *